2023

ರೇಡಿಯೊ ಮಣಿಪಾಲ್ ಡ್ ಬಂಜಿನಕ್ಲೆನ ಪಥ್ಯೆ ತೆನಸ್ ದ ಅಗತ್ಯತೆದ ಬಗೆಟ್ ಪೊಲಬು

ಮಣಿಪಾಲ: ರೇಡಿಯೊ ಮಣಿಪಾಲ್ 90.4 MHz ಡ್ ಕಸ್ತೂರ್ಬಾ ಆಸ್ಪತ್ರೆ ಮಣಿಪಾಲ ಬೊಕ್ಕ ಮಣಿಪಾಲ್ ಇನ್ಸ್ಟಿಟ್ಯೂಟ್ ಆಫ್ ಕಮ್ಯುನಿಕೇಶನ್ ದ ಒಟ್ಟುಸೇರಿಗೆಡ್ ನಡಪುನ ಆರೋಗ್ಯ ದರ್ಶನ ಲೇಸ್ ಡ್ ಬಂಜಿನಕ್ಲೆಗ್ ಪಥ್ಯೆ ತೆನಸ್ ದ ಅಗತ್ಯತೆದ ಬಗೆಟ್ ಪೊಲಬು ಫೆ.22 ಬುಧಾರ ಬಯ್ಯಗ್ 5 ಗಂಟೆಗ್ ಪ್ರಸಾರ ಆಂಡ್.

ಈ ಲೇಸ್ ಡ್ ಮಣಿಪಾಲದ ಕಸ್ತೂರ್ಬಾ ಹಾಸ್ಪಿಟಲ್ ದ ಕ್ಲಿನಿಕಲ್ ನ್ಯೂಟ್ರಿಷನ್ ಆಂಡ್ ಡಯಟಾಟಿಕ್ಸ್ ವಿಭಾಗಡ್ ಪಥ್ಯಾಹಾರ ತಜ್ಞೆರಾಯಿನ ಸುವಿಧಾ ಎಸ್ ಪಾಲ್ ಪಡೆಯೆರ್. ನನ ಫೆ.23 ಮಧ್ಯಾಹ್ನ 1 ಗಂಟೆಗ್ ಮರುಪ್ರಸಾರ ಆಪುಂಡು.

ಕಂಕನಾಡಿ ಶ್ರೀ ಬ್ರಹ್ಮಬೈದರ್ಕಳ ಗರೊಡಿದ 150 ನೇ ವರ್ಷ ಸಂಭ್ರಮದ ಲೆಪ್ಪೋಲೆ ಬುಡುಗಡೆ

ಕಂಕನಾಡಿ ಶ್ರೀ ಬ್ರಹ್ಮಬೈದರ್ಕಳ ಗರೊಡಿ ಕ್ಷೇತ್ರದ 150 ನೇ ವರ್ಷದ ಸಂಭ್ರಮಾಚರಣೆದ ಲೆಪ್ಪೋಲೆನ್ ದ.ಕ. ಕ್ಯಾಟರಿಂಗ್ ಅಸೋಸಿಯೇಷನ್ ಕುಡ್ಲ ನೆತ್ತ ಅಧ್ಯಕ್ಷೆರ್ ರಾಜಗೋಪಾಲ್ ರೈ ಮೇರ್ ಸಂಘದ ಕಚೇರಿಡ್ ಬುಡುಗಡೆ ಮಲ್ತೆರ್.

ಈ ಪೊರ್ತುಡು ಸಂಘದ ಗೌರವಾಧ್ಯಕ್ಷೆರ್ ಸುಧಾಕರ್ ಕಾಮತ್, ವಿ. ವಿ. ಎನ್. ಲಾಸ್ರದೋ, ಕಾರ್ಯದರ್ಶಿ ಜೆಸ್ಸಿ ಸಿಕ್ವೇರಾ, ಕೋಶಾಧಿಕಾರಿ ರಾಜೇಶ್ ಶೆಟ್ಟಿ, ಮಾಜಿ ಅಧ್ಯಕ್ಷೆರ್ ಸತೀಶ್ ಬೋಳಾರ್, ಅನಿಶ್, ಸಂತೋಷ ಡಿಸೋಜ, ವಿಜಯ ಕುಮಾರ್ ಸುರತ್ಕಲ್, ವಿಜಯ ಕುಮಾರ್ ಎಸ್ ಆರ್, ಪ್ರಸಾದ್ ಅಂಚನ್, ನಾರಾಯಣ ಬಂಟ್ವಾಳ್ ಬೊಕ್ಕ ಬ್ರಹ್ಮ ಬೈದರ್ಕಳ ಗರೊಡಿದ ದಿವರಾಜ್ ಇತ್ತೆರ್.

ಶಿಶಿಲ ಕಂಚಿನಡ್ಕ ಸ್ವಾಮಿ ಕೊರಗಜ್ಜ ದೈವ ಸನ್ನಿಧಿಡ್ ನಡತ್ಂಡ್ ಕೊರಗಜ್ಜನ ಕೋಲ

ಶಿಶಿಲ ಕಂಚಿನಡ್ಕ ಸ್ವಾಮಿ ಕೊರಗಜ್ಜ ದೈವ ಸನ್ನಿಧಿಡ್ ಕೊರಗಜ್ಜನ ಕೋಲ ನಡತ್ಂಡ್.

ಈ ಲೇಸ್ ಡ್ ಊರುದ ಪರವೂರುದ ಮಾತ ಸಮಸ್ತ ಭಕ್ತಾದಿಲು ಪಾಲ್ ಪಡೆದ್ ಅಜ್ಜನ ಕೃಪೆಗ್ ಪಾತ್ರರಾಯೆರ್.

ದುಬೈಡ್ ನಡತ್ಂಡ್ ಸಾಮೂಹಿಕ ಶ್ರೀ ಸತ್ಯನಾರಾಯಣ ಪೂಜೆ

ದುಬೈ: ಸಾಮೂಹಿಕ ಶ್ರೀ ಸತ್ಯನಾರಾಯಣ ಪೂಜಾ ಸಮಿತಿದ ಮುತಾಲಿಕೆಡ್ 15 ನೇ ವರ್ಷದ ಶ್ರೀ ಸತ್ಯನಾರಾಯಣ ಪೂಜೆ ಫೆ.19 ಕ್ ಐತಾರ ಬೊಲ್ಪುಗು 10 ಗಂಟೆಗ್ ದುಬೈದ ಅಲ್ ಗಿಸೇಸ್‌ ಡ್ ಇಪ್ಪುನ ಇಂಡಿಯನ್ ಅಕಾಡೆಮಿ ಸ್ಕೂಲ್ ದ ಚಾವಡಿಡ್ ನಡತ್ಂಡ್.

ಈ ಲೇಸ್ ಡ್ ಯುಎಇದ ಭಕ್ತಾದಿಲು ಸಾರರ್ದ್ ಎಚ್ಚ ಸಂಖ್ಯೆಡ್ ಪಾಲ್ ಪಡೆಯೆರ್. ಮುತ್ತೈದೆನಕುಲು ತುಡರ್ ಅರ್ಲಾದ್ ಪೂಜೆದ ಉದಿಪನ ಮಲ್ತೆರ್. ರಘುರಾಜ್ ಭಟ್ ಮೆರೆನ ಪೌರೋಹಿತ್ಯಡ್ ಶ್ರೀ ಸತ್ಯನಾರಾಯಣ ಪೂಜೆ, ಪ್ರಾರ್ತನೆ, ಸಂಕಲ್ಪ, ಗುರು ಗಣಪತಿ ಪೂಜೆ, ಕಳಸ ಪ್ರತಿಷ್ಠಾಪನೆ, ನವಗ್ರಹ ಪೂಜೆ, ಸತ್ಯನಾರಾಯಣ ವೃತ ಕಲ್ಪೊಕ್ತ ಪೂಜೆ, ಶ್ರೀ ಸತ್ಯನಾರಾಯಣ ಕಥೆ, ಮಹಾ ಮಂಗಳಾರತಿ, ಬ್ರಾಹ್ಮಣ ಅರಾಧನೆ, ಸುಮಂಗಲಿ ಪೂಜೆ, ಕನ್ನಿಕಾ ಪೂಜೆ ನಡತ್ಂಡ್. ಬೊಕ್ಕ ಸಪಾದ ಪ್ರಸಾದ ಪಟ್ಟಿಯೆರ್. ಅವೆರ್ದ್ ಬೊಕ್ಕ ಅನ್ನಸಂತರ್ಪಣೆ ನಡತ್ಂಡ್.

ಪೂಜೆದ ಪ್ರತಿನಿಧಿಯಾದ್ ಪಾರಿಜಾ ಆನಂದ್ ಬೈಲೂರ್ ಬೊಕ್ಕ ಶಾಲಿನಿ ಸಂದೇಶ್ ಜೈನ್ ಅಂಗಡಿಬೆಟ್ಟು ಪೂಜೆಡ್ ಪಾಲ್ ಪಡೆಯೆರ್. ಸುಮಂಗಲಿ ಪೂಜೆಡ್ ಅಮೃತಾ ಕೆಂಜೂರ್, ವಿಜಯಲಕ್ಷ್ಮಿ, ರಮಾದೇವಿ ನಾಯಕ್, ವತ್ಸಲಾ ಶೆಟ್ಟಿ, ಗೀತಾ ಮೋಹನ್ ಪಾಲ್ ಪಡೆಯೆರ್.

ಕನ್ನಿಕಾರಾಧನೆಡ್ ತೇಜಶ್ರೀ, ಶ್ರೇಯಾ, ನಕ್ಷತ್ರ, ನಿಶಿಕಾ ಪುನೀತ್, ಐಶಾನಿ ಶೆಟ್ಟಿ ಪಾಲ್ ಪಡೆಯೆರ್. ಮೊಗವೀರ್ಸ್ ಭಜನಾ ಮಂಡಳಿ ದುಬೈ ಬೊಕ್ಕ ಶ್ರೀ ರಾಜರಾಜೇಶ್ವರಿ ಭಜನಾ ತಂಡಾ ದುಬೈ ನೆತ್ತ ವತಿರ್ದ್ ಭಕ್ತಿ ಸಂಗೀತ ದೀಪ ನೃತ್ಯ ಸೇವೆ ಲೇಸ್ ನಡತ್ಂಡ್.

ಶ್ರೀ ವರಮಹಾಲಕ್ಷ್ಮಿ ಪೂಜಾ ಸೇವಾ ಸಮಿತಿ, ಬಿರುವೆರ್ ಕುಡ್ಲ ದುಬೈ, ಗಾಣಿಗ ಸಮಾಜ ದುಬೈ ಸ್ವಯಂ ಸೇವಕೆರಾದ್ ಇತ್ತೆರ್. ಆಕರ್ಷಕ ಪೂಜೆದ ಮಂಟಪ ರಾಜೇಶ್ ಕುತ್ತಾರ್, ದೀಪಕ್ ಕೊಟ್ಯಾನ್, ಪುರಂದರ ಮೊಕುಲು ನಿರ್ಮಾಣ ಮಲ್ತ್ ದ್ ಇತ್ತೆರ್.

ಸಾಮೂಹಿಕ ಶ್ರೀ ಸತ್ಯನಾರಾಯಣ ಸಮಿತಿದ ಅಂಚೆನೆ ಬಿಲ್ಲವ ಸಮಾಜದ ಸತೀಶ್ ಪೂಜಾರಿ, ಜೀವನ ಕುಕ್ಯಾನ್ ಬೊಕ್ಕ ಜಗನ್ನಾಥ್, ಬಂಟ ಸಮುದಾಯದ ವಿಶ್ವನಾಥ್ ಶೆಟ್ಟಿ, ವಾಸು ಶೆಟ್ಟಿ ಬೊಕ್ಕ ಗಣೇಶ್ ರೈ, ವಿಶ್ವಕರ್ಮ ಸಮಾಜ ಶಾಂತಾರಾಮ ಆಚಾರ್, ಮೊಗವೀರ್ಸ್ ಸಮುದಾಯದ ಬಾಲಕೃಷ್ಣ ಸಾಲಿಯಾನ್, ಪದ್ಮಶಾಲಿ ಸಮುದಾಯದ ಧನಂಜಯ ಶೆಟ್ಟಿಗಾರ್, ಜೈನ್ ಸಮಾಜದ ಸಂದೇಶ್ ಜೈನ್, ಕುಲಾಲ್ ಸಮಾಜದ ಪದ್ಮರಾಜ್ ಎಕ್ಕಾರ್, ರಾಮಕ್ಷತ್ರೀಯ ಸಮಾಜದ ಸುಗಂಧರಾಜ್ ಬೇಕಲ್, ರಜಕ ಸಮಾಜದ ದಿನೇಶ್, ಗಾಣಿಗ ಸಮಾಜದ ರಮೇಶ್, ಮೊಕುಲು ಪೂಜೆದ ಲೇಸ್ ನ್ ಆಯೋಜನೆ ಮಲ್ತಿನಕುಲು.

ಮಹಾಪ್ರಸಾದ ಸಾಹಿಬಾ ಕ್ಯಾಟರಿಂಗ್ ದ ಶೇಖರ ಶೆಟ್ಟಿ ಮೆರೆನ ಆದಿತ್ತ್ಂಡ್. ಯು.ಎ.ಇದ ಬೇತೆ ಬೇತೆ ಕಡೆರ್ದ್ ಬತ್ತಿನ ಭಕ್ತಾದಿಲು ಪೂಜೆಡ್ ಪಾಲ್ ಪಡೆದ್ ಪ್ರಸಾದ ದೆತೊಂಡೆರ್.

Three persons from the Billava community must be given the Congress ticket -Billava leaders ಮೂಜಿ ಜನ ಬಿಲ್ಲವ ಅಭ್ಯರ್ಥಿಲೆಗ್ ಕಾಂಗ್ರೆಸ್ ಟಿಕೆಟ್ ಕೊರೊಡು: ಬಿಲ್ಲವ ಮುಖಂಡೆರ್

ವಿಧಾನಸಭೆ ವೋಟ್ ಗ್ ಉಂತರೆ ದಕ್ಷಿಣ ಕನ್ನಡ ಜಿಲ್ಲೆದ ಕನಿಷ್ಠ 3 ಬಿಲ್ಲವ ಅಭ್ಯರ್ಥಿಲೆಗ್ ಕಾಂಗ್ರೆಸ್ ಪಕ್ಷರ್ದ್ ಅವಕಾಶ ಕೊರೊಡು ಪಂದ್ ಕಾಂಗ್ರೆಸ್ ಪಕ್ಷದ ಬಿಲ್ಲವ ಮುಖಂಡೆರ್ ಕೇನ್ ದೆರ್.

ಕುಡ್ಲ ಪೇಂಟೆದ ಪ್ರೆಸ್ ಕ್ಲಬ್ ಡ್ ನಡತಿನ ಪತ್ರಿಕಾಗೋಷ್ಠಿಡ್ ಪಾತೆರಿನ ದಕ್ಷಿಣ ಕನ್ನಡ ಜಿಲ್ಲಾ ಕಾಂಗ್ರೆಸ್ ಹಿಂದುಳಿದ ವರ್ಗಲೆನ ಉಪಾಧ್ಯಕ್ಷೆರ್ ಗಣೇಶ್ ಪೂಜಾರಿ ಗಂಜಿಮಠ, ಕಾಂಗ್ರೆಸ್ ಮುಖಂಡೆರ್ ಉಲ್ಲಾಸ್ ಕೋಟ್ಯಾನ್ ಪುತ್ತೂರ್ ಮೊಕುಲು, ದ.ಕ. ಜಿಲ್ಲೆಡ್ ಎಚ್ಚ ಸಂಖ್ಯೆಡ್ ಇಪ್ಪುನ ಬಿಲ್ಲವೆರ್ ಸುಳ್ಯ ಬುಡ್ದು ಒರಿನ 7 ವಿಧಾನಸಭೆ ಕ್ಷೇತ್ರಡ್ ನಿರ್ಣಾಯಕೆರಾತೆರ್ ಪಂದ್ ಪಂಡೆರ್. ಬಿಲ್ಲವ ಸಮುದಾಯದ ಜನಾರ್ದನ ಪೂಜಾರಿ ಮೆರೆನ ನಾಯಕತ್ವಗ್ ಗೌರವ, ಬೆಂಬಲ ಕೊರೊಂದು ಉಂಡು. ಆಂಡ ಅರೆಗ್ ಹುಷಾರ್ ಇಜ್ಜಂದೆ ಆಯಿ ಬೊಕ್ಕ ಕರಿನ ವಿಧಾನಸಭೆ ವೋಟ್ ಡ್ ಒರಿ ಬಿಲ್ಲವ ಅಭ್ಯರ್ಥಿಗ್ ಅವಕಾಶ ಕೊರ್ತುಂಡು. ಬಿಲ್ಲವ ಸಮುದಾಯಗ್ ಸಮರ್ಪಕ ನಾಯಕತ್ವ ಇಜ್ಜಂದೆ ಬಿಲ್ಲವ ಮತದಾರೆರ್ ಕಾಂಗ್ರೆಸ್ ಬುರ್ದು ಬೇತೆ ಪಕ್ಷದ ಬಗ್ಗೆ ಗಮನ ಕೊರೊಂದು ಉಲ್ಲೆರ್. ನೆನ್ ಪಕ್ಷದ ವರಿಷ್ಠರೆನ ಗಮನಗ್ ಕನದ್ಂಡ್. ಆರ್ ಸಕಾರಾತ್ಮಕವಾದ್ ಸ್ಪಂದಿಸಾದೆರ್ ಪಂದ್ ತೆರಿಪಾದೆರ್.

Tickets of the play Shivadoothe Gulige released in Dubai ದುಬೈಡ್ ಬುಡುಗಡೆ ಆಂಡ್ ಶಿವದೂತೆ ಗುಳಿಗೆ ನಾಟಕದ ಟಿಕೆಟ್

ದುಬೈ: ಕಲಾ ಸಂಗಮ ಕುಡ್ಲ ಕಲಾವಿದೆರ್ದ್, ವಿಜಯಕುಮಾರ್ ಕೊಡಿಯಲ್ ಬೈಲ್ ರಚನೆ ಬೊಕ್ಕ ನಿರ್ದೇಶನದ “ಶಿವದೂತೆ ಗುಳಿಗೆ” ನಾಟಕ ಮಾ.19 ಕ್ಕ್ ದುಬೈಡ್ ಪ್ರದರ್ಶನ ಆವರೆ ಉಂಡು. ಈ ನಾಟಕದ ಟಿಕೆಟ್ ಬುಡುಗಡೆ ಲೇಸ್ ಫೆ.19 ಕ್ ಗಿಸೇಸ್ ದ ಫಾರ್ಚೂನ್ ಪ್ಲಾಝದ ಚಾವಡಿಡ್ ನಡತ್ಂಡ್.

ಅಬುಧಾಬಿ ಕರ್ನಾಟಕ ಸಂಘದ ಅಧ್ಯಕ್ಷೆರ್ ಸರ್ವೋತ್ತಮ ಶೆಟ್ಟಿ, ಫಾರ್ಚೂನ್ ಗ್ರೂಪ್ ಆಫ್ ಹೋಟೆಲ್‌ ದ ಮಾಲಕೆರ್ ವಕ್ವಾಡಿ ಪ್ರವೀಣ್ ಕುಮಾರ್ ಶೆಟ್ಟಿ, ಬಿಲ್ಲವಾಸ್ ದುಬೈದ ಅಧ್ಯಕ್ಷೆರ್ ಪ್ರಭಾಕರ ಸುವರ್ಣ, ಬಿಲ್ಲವಾಸ್ ದ ಸತೀಶ್ ಪೂಜಾರಿ, ಕನ್ನಡ ಪಾಠ ಶಾಲೆ ದುಬೈದ ಶಶಿಧರ್ ನಾಗರಂಜಪ್ಪ, ಮೊಗವೀರ್ಸ್ ಸಮಾಜದ ಬಾಲಕೃಷ್ಣ ಸಾಲಿಯಾನ್, ಉದ್ಯಮಿಲಾಯಿನ ಗುಣಶೀಲ್ ಶೆಟ್ಟಿ, ಪ್ರೇಮನಾಥ ಶೆಟ್ಟಿ, ಹರೀಶ್ ಬಂಗೆರ, ಪದ್ಮಶಾಲಿ ಸಮಾಜದ ಧನಂಜಯ ಶೆಟ್ಟಿಗಾರ್, ಅಲ್ ಫರ್ದಾನ್ ಎಕ್ಸ್ ಚೇಂಜ್ ದ ಸಿಇಓ ತಾರಾನಾಥ ರೈ, ಚಿತ್ರ ನಿರ್ಮಾಪಕೆರ್ ಆತ್ಮಾನಂದ ರೈ, ಸಂಘಟಕೆರ್ ನೊವೆಲ್ ಅಲ್ಮೇಡಾ, ದಯಾ ಕಿರೋಡಿಯನ್ ತುಡರ್ ಅರ್ಲಾದ್ ಲೇಸ್ ದ ಉದಿಪನ ಮಲ್ತೆರ್.

ಮಾ.19 ಕ್ಕ್ ಪೇಂಟೆದ ಉದುಮೇತದ ಅಲ್ ನಸರ್ ಲ್ಯಾಂಡ್ ದ ಐಸ್ ಲಿಂಕ್ ಡ್ ಮಧ್ಯಾಹ್ನ 2.30 ಗು ಬೊಕ್ಕ ಬಯ್ಯ 6 ಗಂಟೆಗ್ ನಾಟಕ ಪ್ರದರ್ಶನ ಆಪುಂಡು. ಈ ನಾಟಕದ ಟಿಕೆಟ್ ಲೆನ್ ಗಣ್ಯೆರ್ ಬುಡುಗಡೆ ಮಲ್ತೆರ್. ‌

ತುಳುನಾಡ್ ದ ದೈವ ದೇವೆರೆನ ಕಥೆ ಇಪ್ಪುನ ಈ ನಾಟಕನ್ ಯುಎಇಡ್ ಇಪ್ಪುನ ಮಾತ ತುಳು ಕನ್ನಡಿಗೆರ್ ತೂವೊಡು. ಇಸೇಸವಾದ್ ಈ ನಾಟಕನ್ ನಮ್ಮ ಜೋಕುಲೆಗ್ ತೊಜಪಾದ್ ನಮ್ಮ ತುಳುವ ಸಂಸ್ಕೃತಿನ್ ಒರಿಪುನಂಚಿನ ಪ್ರಯತ್ನ ಈ ನಾಟಕದ ಮುಖೇನ ಆವು. ಇತ್ತೆ ಕರ್ನಾಟಕ ಬೊಕ್ಕ ಕೇರಳದ ಗಡಿನಾಡ್ ಡ್ 400 ರ್ದ್ ಎಚ್ಚ ಪ್ರದರ್ಶನ ಆಯಿನ ಈ ನಾಟಕನ್ ದುಬೈಡ್ ಹೌಸ್ ಫುಲ್ ಪ್ರದರ್ಶನ ಮಲ್ಪುನವು ಎಂಕ್ಲೆನ, ನಿಕ್ಲೆನ ಮಾತೆರ್ನಲ ಜಬದಾರಿ ಪಂದ್ ಪಾತೆರ್ದ್, ನಾಟಕಗ್ ಎಡ್ಡೆಪ್ಪು ಬಯಕಿಯೆರ್.

ನಾಟಕದ ಸಂಚಾಲಕೆರ್ ಹರೀಶ್ ಬಂಗೇರ, ದಿನೇಶ್ ಶೆಟ್ಟಿ ಕೊಟ್ಟಿಂಜ, ರಾಜೇಶ್ ಕುತ್ತಾರ್, ಗಿರೀಶ್ ನಾರಾಯಣ್, ಪ್ರಕಾಶ್ ಪಕಳ, ಶಾನ್ ಪೂಜಾರಿ ಬತ್ತಿನ ಬಿನ್ನೆರೆಗ್ ಪುರ್ಪದ ಗೊಂಚಿಲ್ ಕೊರ್ದು ಎದ್ಕೊನಿಯೆರ್. ಗಿರೀಶ್ ನಾರಾಯಣ್ ಶಿವದೂತೆ ಗುಳಿಗೆ ನಾಟಕ ಒಲ್ಪೊಲ್ಪ ಪ್ರದರ್ಶನ ಆತ್ಂಡ್ ಪನ್ಪುನ ಪೊಲಬುನ್ ಕೊರಿಯೆರ್. ರಾಜೇಶ್ ಕುತ್ತಾರ್ ಲೇಸ್ ದ ಸುಧಾರಿಕೆ ಮಲ್ತ್ ದ್ ಸೊಲ್ಮೆ ಸಂದಾಯೆರ್.

2,500 ಸೀಟ್ ಇಪ್ಪುನ ಈ ಸಭಾಂಗಣಡ್ ರಡ್ಡ್ ಪ್ರದರ್ಶನಡ್ 5,000 ಜನ ತುಳು – ಕನ್ನಡಿಗೆರ್ ಈ ನಾಟಕನ್ ತೂವೆರೆ ಉಲ್ಲೆರ್. ಇತ್ತೆ ನಾಟಕದ ಟಿಕೆಟ್ ಗಾದ್ ಸಾರರ್ದ್ ಎಚ್ಚ ಫೋನ್ ಬೈದ್ಂಡ್. ಟಿಕೆಟ್ ಲೆನ್ ಇನಿರ್ದ್ ನಿಕುಲೆನ ಮಲ್ತೊಂಡ ನಾಟಕ ತೂಪುನ ಅವಕಾಶ ತಿಕ್ಕು ಪಂದ್ ಸಂಚಾಲಕೆರ್ ಬಿನ್ನಾಪು ಮಲ್ದೆರ್.

ವರದಿ: ವಿಜಯಕುಮಾರ್ ಶೆಟ್ಟಿ ಗಾಣದಮೂಲೆ ಮಜಿಬೈಲ್ (ದುಬೈ)
ಚಿತ್ರ : ವಿವೇಕ್ ಆನಂದ್ ದುಬೈ

Tickets of the play Shivadoota Guliga released in Dubai

Dubai: The play Shivadoota Guliga played under Kala Sangama , Mangalore and written by Vijay Kumar Kodialbail will be played on March 19 th at Dubai.
The tickets for the same was released on February 19 th.Two shows of the Play will be held.