2023

Soft Selection Commission (SSC) 5369 vacancies-applications called for ಸ್ಟಾಫ್ ಸೆಲೆಕ್ಷನ್ ಕಮಿಷನ್ (SSC) ಡ್ 5369 ಬೇಲೆ

ಸ್ಟಾಫ್ ಸೆಲೆಕ್ಷನ್ ಕಮಿಷನ್ (SSC) ಡ್ ಖಾಲಿ ಇಪ್ಪುನ 5369 ಬೇಲೆಗ್ ಅರ್ಜಿ ಪಾಡೊಲಿ.

ನೆಟ್ಟ್ ಇನ್ವೆಸ್ಟಿಗೇಟರ್ ಗ್ರೇಡ್-2, ಅಕೌಂಟೆಂಟ್, ಟೆಕ್ನಿಕಲ್ ಅಸಿಸ್ಟೆಂಟ್ ಬೇಲೆಲು ಉಂಡು. 10 ನೇ ಕ್ಲಾಸ್, ಇಂಟರ್, ಪದವಿಗ್ ಅನುಗುಣವಾದ್ ಅರ್ಜಿ ಪಾಡೊಲಿ. 18 ರ್ದ್ 30 ವರ್ಷದೊಲಯಿ ಇಪ್ಪೊಡು. ಅರ್ಜಿ ಸಂದಾಯೆರೆ ಮಾ.27 ಅಕೇರಿದ ತಾರೀಕ್. ಅರ್ಜಿ ಶುಲ್ಕ 100 ರೂ. ಕಟ್ಟೊಡು. ನೆತ್ತ ಪರೀಕ್ಷೆ ಜೂನ್ ಅತ್ತಂಡ ಜುಲೈ ತಿಂಗೊಲ್ಡ್ ನಡಪುನ ಸಾಧ್ಯತೆ ಉಂಡು. ನೆತ್ತ ವೆಬ್‌ಸೈಟ್: https://ssc.nic.in

Soft Selection Commission (SSC) 5369 vacancies-applications called for

Applications are called for 5369 vacancies in different categories of SSC.
For more details and information log on to their website: https://ssc. nic. in

37 th Annual Vijay – Vikrama Kambala at Ubaar on March 11th ಮಾ.11: ಉಬಾರ್ ಡ್ 37ನೇ ವರ್ಷದ ವಿಜಯ-ವಿಕ್ರಮ ಜೋಡು ಕರೆ ಕಂಬುಲ

ಉಬಾರ್ ವಿಜಯ-ವಿಕ್ರಮ ಜೋಡು ಕರೆ ಕಂಬುಲ ಸಮಿತಿದ ಮುತಾಲಿಕೆಡ್, ಧರ್ಮಸ್ಥಳದ ಧರ್ಮಾಧಿಕಾರಿ ಡಾ.ಡಿ ವೀರೇಂದ್ರ ಹೆಗ್ಗಡೆ ಮೆರೆನ ಆಶೀರ್ವಾದದೊಟ್ಟಿಗೆ, ಕೋಡಿಂಬಾಡಿ ರೈ ಎಸ್ಟೇಟ್ ದ ಅಶೋಕ್ ಕುಮಾರ್ ರೈ ಕೆ.ಎಸ್ ಮೆರೆನ ಸಾರಥ್ಯಡ್ 37ನೇ ವರ್ಷದ ಫ್ಲಡ್ ಲೈಟ್ ವಿಜಯ-ವಿಕ್ರಮ ಜೋಡುಕರೆ ಕಂಬುಲ ಮಾ.11 ಸನಿಯಾರ ನೇತ್ರಾವತಿ ತುದೆ ಬರಿತ ಕೂಟೇಲು (ಹಳೇಗೇಟ್) ಶ್ರೀ ಕ್ಷೇತ್ರ ಧರ್ಮಸ್ಥಳದ ಜಾಗೆ ಉಬಾರ್ ಡ್ ನಡಪರೆ ಉಂಡು.

ಬಯ್ಯಗ್ ನಡಪುನ ಸಭಾ ಲೇಸ್ ದ ಗುರ್ಕಾರ್ಮೆನ್ ಮಾಜಿ ಸಚಿವೆರ್ ಡಿ.ವಿ ಸದಾನಂದ ಗೌಡ ಒಯಿಸೊನ್ವೆರ್. ಮಲ್ಲ ಬಿನ್ನೆರಾದ್ ಸಂಸದೆರ್ ನಳಿನ್ ಕುಮಾರ್ ಕಟೀಲ್, ಮಾಜಿ ಸಚಿವೆರ್ ಬಿ. ರಮಾನಾಥ ರೈ, ಪುತ್ತೂರ್ ಶಾಸಕೆರ್ ಸಂಜೀವ ಮಠಂದೂರು, ಮಾಜಿ ಶಾಸಕೆರ್ ಶಕುಂತಲಾ ಶೆಟ್ಟಿ, ಉಳ್ಳಾಲ ಶಾಸಕೆರ್ ಯು.ಟಿ ಖಾದರ್ ಬೊಕ್ಕ ಸುಮಾರ್ ಗಣ್ಯೆರ್ ಪಾಲ್ ಪಡೆಯೆರೆ ಉಲ್ಲೆರ್.

ಎರ್ಲುಕುಲು ಕರೆಕ್ಕ್ ಜಪ್ಪುನ ಪೊರ್ತು

ನಾಯೆರ್ ದ ಎಲ್ಯ ಬೊಲ್ಪುಗು 10.31 ಕ್ಕ್, ಬಲ್ಲ್ ದ ಎಲ್ಯ ಬೊಲ್ಪುಗು 11.30 ಕ್ಕ್, ನಾಯೆರ್ ದ ಮಲ್ಲ ಮಧ್ಯಾಹ್ನ 12.30ಕ್ಕ್ , ಬಲ್ಲ್ ದ ಮಲ್ಲ 2 ಗಂಟೆಗ್, ಅಡ್ಡ ಪಲಯಿ ಬೊಕ್ಕ ಕನೆ ಪಲಯಿದ ಎರ್ಲು 4 ಗಂಟೆಗ್ ಜಪ್ಪರೆ ಉಂಡು.

ಗೆಂದಿನಕ್ಲೆಗ್ ಇನಾಮು
ಕನೆ ಪಲಯಿ ವಿಭಾಗಡ್ ಸುರುತ ಇನಾಮು 1 ಪವನ್ (7.5 ಕೋಲು ನಿಶಾನಿಗ್ ನೀರ್ ರಾಪಾಂಡ), ರಡ್ಡನೇ ಇನಾಮು 1/2 ಪವನ್ (6.5 ಕೋಲ್ ನಿಶಾನಿಗ್ ನೀರ್ ರಾಪಾಂಡ) ತಿಕ್ಕುಂಡು.
ಅಡ್ಡ ಪಲಯಿ ವಿಭಾಗಡ್ ಸುರುತ ಇನಾಮು 1 ಪವನ್, ರಡ್ಡನೇ ಇನಾಮು 1/2 ಪವನ್ ತಿಕ್ಕುಂಡು. ಬಲ್ಲ್ ದ ವಿಭಾಗಡ್ ಸೀನಿಯರ್ ಗ್ ಸುರುತ ಇನಾಮು 1 ಪವನ್, ರಡ್ಡನೇ ಇನಾಮು 1/2 ಪವನ್ ಬೊಕ್ಕ ಜೂನಿಯರ್ ಗ್ ಸುರುತ ಇನಾಮು 1 ಪವನ್, ರಡ್ಡನೇ ಇನಾಮು 1/2 ಪವನ್ ತಿಕ್ಕುಂಡು‌. ಅಂಚನೆ ನಾಯೆರ್ ವಿಭಾಗಡ್ ಸೀನಿಯರ್ ಗ್ ಸುರುತ ಇನಾಮು 1 ಪವನ್, ರಡ್ಡನೇ ಇನಾಮು 1/2 ಪವನ್ ಬೊಕ್ಕ ಜೂನಿಯರ್ ಗ್ ಸುರುತ ಇನಾಮು 1 ಪವನ್, ರಡ್ಡನೇ ಇನಾಮು 1/2 ಪವನ್ ತಿಕ್ಕುಂಡು‌.

ಈ ಲೇಸ್ ಗ್ ಕಂಬುಲಾಭಿಮಾನಿಲು, ಎರ್ಲೆನ ಯಜಮಾನೆರ್ ಎಚ್ಚದ ಸಂಖ್ಯೆಡ್ ಪಾಲ್ ಪಡೆದ್, ಲೇಸ್ ನ್ ಪೊರ್ಲು ಮಲ್ತ್ ದ್ ಕೊರೊಡು ಪಂದ್ ಉಬಾರ್ ವಿಜಯ-ವಿಕ್ರಮ ಜೋಡುಕೆರೆ ಕಂಬುಲ ಸಮಿತಿದ ಅಧ್ಯಕ್ಷೆರ್ ಕೋಡಿಂಬಾಡಿ ರೈ ಎಸ್ಟೇಟ್ ದ ಅಶೋಕ್ ಕುಮಾರ್ ರೈ. ಕೆ ಎಸ್ ಬೊಕ್ಕ ಗೌರವಾಧ್ಯಕ್ಷೆರ್ ಎನ್ ಉಮೇಶ್ ಶೆಣೈ ಅಂಚೆನೆ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

Two persons die in an accident between a scooty and tanker nearby the Bappanadu bridge ಬಪ್ಪನಾಡ್ ಸಂಕದಲ್ಪ ಸ್ಕೂಟಿಗ್ ಟ್ಯಾಂಕರ್ ಗುದ್ದುದು 2 ಜನ ತೀರ್ ಪೋಯೆರ್!

ಮುಲ್ಕಿ : ಬಪ್ಪನಾಡ್ ಸಂಕದಲ್ಪ ಸ್ಕೂಟಿಗ್ ಟ್ಯಾಂಕರ್ ಗುದ್ದುದು ರಡ್ಡ್ ಜನ ತೀರ್ ಪೋಯಿನ ಘಟನೆ ಅಂಗಾರೆ ಮಧ್ಯಾಹ್ನ ನಡತ್ಂಡ್.

ತೀರ್ಥಹಳ್ಳಿದ ಮುಸ್ಲಿಂ ಒಕ್ಕೂಟದ ಅಧ್ಯಕ್ಷೆರ್ ಅಕ್ಬರ್ ಬೊಕ್ಕ ಅರೆನ ಬೊಡೆದಿ ಸ್ಕೂಟಿರ್ದ್ ತಿರ್ತ್ ಬೂರ್ದು ತರೆಕ್ಕ್ ಪೆಟ್ಟಾದ್ ಅಲ್ಪನೇ ತೀರ್ ಪೋತೆರ್. ಅಕುಲು ತೀರ್ಥ ಹಳ್ಳಿರ್ದ್ ಸ್ಕೂಟರ್ ಡ್ ಕುಡ್ಲಗ್ ಬರೊಂದಿತ್ತೆರ್ ಪಂದ್ ತೆರಿದ್ ಬೈದ್ಂಡ್.ಮುಲ್ಕಿ ಪೊಲೀಸೆರ್ ಬತ್ತ್ ದ್ ಪರಿಶೀಲನೆ ಮಲ್ತ್ ದೆರ್.

A freak baby born in Rajasthan !! ಒಂಜಿ ಮಂಡೆ , 2 ಹೃದಯ, 4 ಕಾರ್, 4 ಕೈತ್ತ ಬಾಲೆ!

ರಾಜಸ್ಥಾನಡ್ ಒಂಜಿ ಮಂಡೆ, 2 ಹೃದಯ, 4 ಕಾರ್, 4 ಕೈತ್ತ ಬಾಲೆ ಪುಟ್ಟಿನ ಘಟನೆ ನಡತ್ಂಡ್.

ಹಜಾರಿ ಸಿಂಗ್ ಪನ್ಪುನ ಪೊಂಜೋವ್ ಪೆದ್ದರೆ ಆಸ್ಪತ್ರೆಗ್ ದಾಖಲ್ ಆದಿತ್ತೆರ್. ಅಲ್ಪ ಆರೆಗ್ ಪುಟ್ಟಿನ ಬಾಲೆಗ್ 1 ಮಂಡೆ, 2 ಹೃದಯ, 2 ಬೆರಿ, 4 ಕಾರ್ ಬೊಕ್ಕ 4 ಕೈ ಇತ್ಂಡ್ ಪಂದ್ ವೈದ್ಯೆರ್ ತೆರಿಪಾದೆರ್. ಈ ಬಾಲೆ 20 ನಿಮಿಷದ ಬೊಕ್ಕ ತೀರ್ ಪೋತುಂಡ್ ಪಂದ್ ತೆರಿದ್ ಬೈದ್ಂಡ್.

A freak baby born in Rajasthan !!

A freak baby with one head, two hearts, two backs, four legs and four hands was born at a hospital here. It was breathing for twenty minutes after birth and died soon after.

” Koramma” movie premiere show to be arranged at UAE ಯುಎಇಡ್ “ಕೊರಮ್ಮ” ಪೊಸ ಪಿಕ್ಚರ್ ಪ್ರೀಮಿಯರ್‌ ಶೋ ಅಟ್ಟಣೆ

ಯುಎಇ: “ಗಗ್ಗರ” ಸಿನಿಮಾ ಮಲ್ತ್ ದ್ ರಾಜ್ಯ, ರಾಷ್ಟ್ರ ಪ್ರಶಸ್ತಿ ಪಡೆಯಿನ ನಿರ್ದೇಶಕೆರ್ ಶಿವಧ್ವಜ್ ಶೆಟ್ಟಿ ಮೆರೆನ “ಕೊರಮ್ಮ” ಪೊಸ ಪಿಕ್ಚರ್ ಯುಎಇಡ್ ಪ್ರೀಮಿಯರ್‌ ಪ್ರದರ್ಶನಗ್ ರೆಡಿ ಆವೊಂದುಂಡು.

ಇಂಚಿಪ್ಪ ಕುಡ್ಲದ ಭಾರತ್ ಮಾಲ್ ಡ್ ನಡತಿನ ಪ್ರೀಮಿಯರ್ ಪ್ರದರ್ಶನನ್ ಜನ ಮೆಚ್ಚಿನವು ಚಿತ್ರರಂಗಡ್ ಪೊಸ ನಿರೀಕ್ಷೆನ್ ಕನದ್ಂಡ್. ದುಬೈ ಮೂಲದ ಈಶ್ವರಿದಾಸ್ ಶೆಟ್ಟಿ ಬೊಕ್ಕ ರಾಜೇಶ್ವರಿ ರೈ ಮೆರೆನ ನಿರ್ಮಾಣದ “ಕೊರಮ್ಮ” ಪಿಕ್ಚರ್ ಕುಡ್ಲಡ್ ಹೌಸ್ ಫುಲ್ ಪ್ರದರ್ಶನ ಆಂಡ್. ಕೇವಲ ಪದಿನಾಲ್ ದಿನಟ್ ಪಿಕ್ಚರ್ ದ ಶೂಟಿಂಗ್ ಮುಗಿತಿನ ಈ ಕೂಟ ಸಮಾಜಗ್ ಎಡ್ಡೆ ಸಂದೇಶನ್ ಕೊರ್ತುಂಡು.

80ತ ದಶಕದಂಚ ಇಪ್ಪುನ ಕಥೆ ಆಂಡಲ ಇನಿಕ್ಲಾ ದ.ಕನ್ನಡ, ಒಡಿಪು ಜಿಲ್ಲೆಡ್ ಇಂಚಿನ ಮಸ್ತ್ ಕಥೆಲು ಜೀವಂತಿಕೆ ಪಡೆತ್ಂಡ್ ಪನ್ಪುನವೇ ಪಿಕ್ಚರ್ ತೂಯಿನ ಬೊಕ್ಕ ಪ್ರಶ್ನೆಯಾದ್ ಒರಿದ್ಂಡ್. ಮಿತ್ತ್-ತಿರ್ತ್, ಬೇದ ಭಾವ, ಜಾತಿಲೆನ ನಡುತ ಸಂಘರ್ಷನೇ ಈ ಪಿಕ್ಚರ್ ದ ಮುಖ್ಯ ಕಥೆ .
“ನಮ್ಮ ಮಿತ್ತ ಜಾತಿ, ಅಕ್ಲೆನ ತಿರ್ತ್ತ ಜಾತಿ ಪಂದ್ ಕೀಳಾದ್ ತೂಪುನ ನಮ್ಮಕ್ಲು “ಕೊರಮ್ಮ” ಪಿಕ್ಚರ್ ನ್ ತೂವೊಡೇ” ಪಂದ್ ಪ್ರೀಮಿಯರ್‌ ಪ್ರದರ್ಶನ ತೂಯಿನ ಪ್ರೇಕ್ಷಕೆರ್ ಪನೊಂದು ಉಲ್ಲೆರ್.

ಮಂಜಯ್ಯ ಹೆಗ್ಡೆ ಪನ್ಪುನ ಗುತ್ತುದ ಯಜಮಾನನ ಗತ್ತ್ ದ ಪಾತ್ರ, ಬೊಡೆದಿ ದೇವಕಿ ಪನ್ಪುನ ಶಾಂತಮೂರ್ತಿ. ಮಂಜಯ್ಯೆರಾದ್ ಕಿರುತೆರೆ ಪುಗರ್ತೆದ ಕಲಾವಿದೆರ್ ಗುರು ಹೆಗ್ಡೆ, ದೇವಕಿಯಾದ್ ರಂಗಭೂಮಿ ಕಲಾವಿದೆ ರೂಪಶ್ರೀ ವರ್ಕಾಡಿ ಮೆರೆನ ಪಾತ್ರ ಪಿಕ್ಚರ್ ಮುಗಿನ ಬೊಕ್ಕಲ ನೆನೆತೊಂದೇ ಇಪ್ಪುಂಡು. ಮೆರೆನ ಮಗನ ಪಾತ್ರಡ್ ಜೀನ ಪ್ರಸಾದ್ ಅಭಿನಯ ಮಲ್ದೆರ್. ಕೊರಮ್ಮ ಪನ್ಪುನವು ಉಳ್ಳಾಯ(ಧಣಿ)ನ ಮಿತ್ತ್ ದ ಪ್ರೀತಿ, ಮೋಕೆ,ಕಾಳಜಿ ತೂಪಾವುನ ಪಾತ್ರ. 80 ದಶಕ ಮಾತ್ರ ಅತ್ತ್ ಇನಿಲ ಅವೆತೊ ಧಣಿ ಇಲ್ಲಡ್, ಗುತ್ತು ಬರ್ಕೆ ಪಂದ್ ತೋಜಿದ್ ಬರ್ಪುನ ಧಣಿ ಬೊಕ್ಕ ಚಾಕರಿದಾಯನ ನಡುತ ಮಿತ್ತ್ ತಿರ್ತ್ ಪನ್ಪುನ ಸಂಘರ್ಷ. ಉಂದೆನ್ ಮಾತ ನಿರ್ದೇಶಕೆರ್ ಶಿವದ್ವಜ್ ಶೆಟ್ಟಿ ಮೇರ್ ಪರಿಣಾಮಕಾರಿಯಾದ್ ನಿರ್ದೇಶನ ಮಲ್ದೆರ್.

ತುಳುನಾಡ್ ದ ಡೋಲು, ಕೊಂಬುದ ಸೊರ, ನಿರೆಲ್, ಬೊಲ್ಪು, ಬರ್ಸನ್ ಸಹಜವಾದ್ ಶೂಟಿಂಗ್ ಮಲ್ತಿನ ಸುರೇಶ್ ಬೈರಸಂದ್ರ ಮೆರೆನ ಕ್ಯಾಮರಾದ ಕೈ ಚಳಕ ಅದ್ಭುತವಾದ್ ಉಂಡು. ಒಟ್ಟು ಪಿಕ್ಚರ್ ದ ಬಗ್ಗೆ ಒಂಜೇ ಪಾತೆರಡ್ ಪನೊಡು ಪಂದಾಂಡ ಈ ಪಿಕ್ಚರ್ ಗ್ ರಾಷ್ಟ್ರ ಪ್ರಶಸ್ತಿ ಪಡೆಯೆರೆ ಅರ್ಹತೆ ಉಂಡು ಪಂದ್ ಪಿಕ್ಚರ್ ತೂಯಿನ ಪ್ರೇಕ್ಷಕೆರೆನ ಅಭಿಪ್ರಾಯ.

ಕುಡ್ಲಡ್ ನಡತಿನ ಪ್ರೀಮಿಯರ್‌ ಪ್ರದರ್ಶನಡ್ ತುಳು ರಂಗಭೂಮಿ ಬೊಕ್ಕ ಚಿತ್ರರಂಗದ ವಿಜಯಕುಮಾರ್ ಕೊಡಿಯಲ್ ಬೈಲ್, ಪಿಕ್ಚರ್ ದ ನಿರ್ದೇಶಕೆರ್ ಶಿವಧ್ವಜ್ ಶೆಟ್ಟಿ, ಬ್ಲಾಗರ್ ಸೂರಜ್ ಶೆಟ್ಟಿ, ನಿರ್ದೇಶಕೆರ್ ಸಂತೋಷ್ ಮಾಡ, ನಿರ್ಮಾಪಕೆರ್ ಈಶ್ವರಿದಾಸ್ ದಾಸ್ ಶೆಟ್ಟಿ, ಮಾದವ ನಾಯಕ್ ಅಡ್ಯಾರ್, ಪಿಕ್ಚರ್ ದ ತಂತ್ರಜ್ಞೆರ್, ಕಲಾವಿದೆರ್ ಇತ್ತೆರ್. ಬಾಲಿವುಡ್ ದ ರಾಮ್ ಶೆಟ್ಟಿ, ಸಿಐಡಿ ಪುಗರ್ತೆದ ದಯಾ ನಾಯಕ್, ಹಿಂದಿ ಪಿಕ್ಚರ್ ದ ನಿರ್ದೇಶಕೆರ್ ಸಂತೋಷ್ ಶೆಟ್ಟಿ ಕೂಟದಕ್ಲೆಗ್ ಪ್ರತ್ಯೇಕ ಪ್ರದರ್ಶನ ಮನದಾನಿ ಇತ್ತ್ಂಡ್. ಮೇ ತಿಂಗೊಲ್ದ ಸುರುತ್ತ ವಾರಡ್ ಯುಎಇಡ್ “ಕೊರಮ್ಮ” ಪಿಕ್ಚರ್ ದ ಪ್ರೀಮಿಯರ್‌ ಪ್ರದರ್ಶನ ಆವರೆ ಉಂಡು. ಈ ಪಿಕ್ಚರ್ ನ್ ಯುಎಇದ ಮಾತ ತುಳು ಪಿಕ್ಚರ್ ಪ್ರೇಮಿಲು ತೂವೊಡೆ ಆಯಿನವು ಬೊಕ್ಕ ತುಳು ಚಿತ್ರರಂಗಗ್ 50 ವರ್ಷ ಆಯಿನ ಪೊರ್ತುಡು “ಕೊರಮ್ಮ” ಪಿಕ್ಚರ್ ತುಳು ಚಿತ್ರರಂಗಗ್ ನಮ್ಮ ಕಾಣಿಕೆ ಪಂದ್ ನಿರ್ಮಾಪಕೆರ್ ಈಶ್ವರಿದಾಸ್ ಶೆಟ್ಟಿ ದುಬೈ ಮೇರ್ ಇಸೇಸ ಚಾನೆಲ್ ಗ್ ತೆರಿಪಾದೆರ್.

ವರದಿ: ವಿಜಯಕುಮಾರ್ ಶೆಟ್ಟಿ ಗಾಣದಮೂಲೆ ಮಜಿಬೈಲ್ (ದುಬೈ)

Shri Vishnu murthi Kshetra , Belluru – Tulu name board put up ಬೆಳ್ಳೂರು ಶ್ರೀ ವಿಷ್ಣುಮೂರ್ತಿ ಕ್ಷೇತ್ರಡ್ ತುಳುಲಿಪಿ ಪುದರ್ ಪಲವೆ ಉದಿಪನ

ಕಾಸ್ರೋಡು : ಬೆಳ್ಳೂರುದ ಕಲ್ಲೇರಿಮೂಲೆ ಶ್ರೀ ವಿಷ್ಣುಮೂರ್ತಿ ಕ್ಷೇತ್ರಡ್ ಮಾ.4 ಸನಿಯಾರ ಜಾತ್ರೆದ ಪೊರ್ತುಡು ತುಳುಲಿಪಿ ಪುದರ್ ಪಲವೆ ಪಾಡುನ ಲೇಸ್ ನಡತ್ಂಡ್.

ಶ್ರೀ ವಿಷ್ಣುಮೂರ್ತಿ ಕ್ಷೇತ್ರ ಕಲ್ಲೇರಿಮೂಲೆ, ಬೆಳ್ಳೂರು, ಕಾಸ್ರೋಡು, ಮುಲ್ಪದ 58ನೇ ವಾರ್ಷಿಕ ಉಚ್ಚಯ ಬೊಕ್ಕ ಜಾತ್ರೆದ ಪೊರ್ತುಡು ಶ್ರೀ ಕ್ಷೇತ್ರ ಸನ್ನಿಧಿಡ್ ಕ್ಷೇತ್ರ ಪರಿಸರದ ಪೆರಿಯ ಕೃಷಿಕೆರ್ ವೊಲಸೆರಿ ಕೇಶವ ಕಡಂಬಳಿತ್ತಾಯ ಮೇರ್ ಕ್ಷೇತ್ರದ ತುಳುಲಿಪಿ ಪುದರ್ ಪಲವೆನ್ ಉದಿಪನ ಮಲ್ತೆರ್.

ಅಧ್ಯಕ್ಷೆರ್ ಮಾಲೆಂಕಿ ಶ್ರೀಪತಿ ಕಡಂಬಳಿತ್ತಾಯ ಮೇರ್ ಪಾತೆರ್ದ್, ಬಾರ್ಕೂರ್ ರ್ದ್ ನೀಲೇಶ್ವರ ಮುಟ್ಟ ಇಪ್ಪುನ ತುಳುನಾಡ್ ದ ಸಂಸ್ಕೃತಿ, ಆಚಾರ, ಇಚಾರ ಬೊಕ್ಕ ತುಳು ಭಾಷೆ, ಲಿಪಿ ನೆನ್ ಒರಿಪಾದ್ ಬುಲೆಪಾಯೆರೆ ಜೈ ತುಲುನಾಡ್ (ರಿ) ಸಂಘಟನೆ ಮಲ್ತಿನ ಮಲ್ಲ ಕಜ್ಜೊ ಮೆಚ್ಚೊಡಾಯಿನವು.
ಸುಬ್ರಹ್ಮಣ್ಯ ಕಡಂಬಳಿತ್ತಾಯ ಪಾತೆರ್ದ್, ಸಂಘಟನೆಗ್ ತನ್ನ ಬೊಕ್ಕ ಕ್ಷೇತ್ರದ ಪದಾಧಿಕಾರಿಲೆನ ಮಾತ ವಿಧೊಟ್ಲಾ ಪರಿಪೂರ್ಣ ಬೆರಿಬಲ ಉಂಡು ಪಂದ್ ಘೋಷಣೆ ಮಲ್ತೆರ್.
ಜೈ ತುಲುನಾಡ್ ಸಂಘಟನೆದ ಜತೆ ಕಾರ್ಯದರ್ಶಿ ಜಗನ್ನಾಥ್ ಕುಲಾಲ್ ಮೇರ್ ಸಂಘಟನೆದ ಮಹತ್ವನ್ ತೆರಿಪಾಯೆರ್. ಈ ಪೊರ್ತುಡು ಬಿನ್ನೆರಾದ್ ಕ್ಷೇತ್ರ ಆಡಳಿತ ಅಧಿಕಾರಿ ವೊಲಸೆರಿ ಸೂರ್ಯನಾರಾಯಣ ಕಡಂಬಳಿತ್ತಾಯ, ಜೈ ತುಲುನಾಡ್ ಸಂಘಟನೆದ ಸುಶಾಂತ್ ಕುಲಾಲ್, ಮಾಸ್ಟರ್ ಸನ್ವಿತ್ ಕುಲಾಲ್, ಬೇಬಿ ಸನ್ನಿಧಿ ಕುಲಾಲ್ ಇತ್ತೆರ್. ಮಾಲೆಂಕಿ ಶ್ರೀಪತಿ ಕಡಂಬಳಿತ್ತಾಯ ಮೇರ್ ಗುರ್ಕಾರ್ಮೆನ್ ಒಯಿಸ್ ದಿತ್ತೆರ್. ಕಬಿ, ಸಾಹಿತಿ ಪುಂಡೂರು ವಿಜಯರಾಜ್ ಪುಣಿಂಚತ್ತಾಯ ಎದ್ಕೊನಿಯೆರ್. ವೊಲಸಿರಿ ಸುಬ್ರಹ್ಮಣ್ಯ ಕಡಂಬಳಿತ್ತಾಯ ಸೊಲ್ಮೆ ಸಂದಾಯೆರ್. ಜಗನ್ನಾಥ್ ಕುಲಾಲ್ ಮೇರ್ ಲೇಸ್ ದ ಸುಧಾರಿಕೆ ಮಲ್ತೆರ್. ಲೇಸ್ ದ ಅಕೇರಿಡ್ ಜೈ ತುಲುನಾಡ್(ರಿ ) ಸಂಘಟನೆದ ವತಿರ್ದ್ ಜಗನ್ನಾಥ್ ಕುಲಾಲ್ ಮೇರ್ ವೊಲಸಿರಿ ಸೂರ್ಯನಾರಾಯಣ ಕಡಂಬಳಿತ್ತಾಯ ಮೆರೆಗ್ ನೆಂಪುದ ಕಾಣಿಕೆ ಕೊರ್ದು ಮಾನಾದಿಗೆ ಮಲ್ತೆರ್.

Holi celebrations today at Srinivas city campus, Pandeshwar ಇನಿ ಪಾಂಡೇಶ್ವರ ಶ್ರೀನಿವಾಸ್ ಸಿಟಿ ಕ್ಯಾಂಪಸ್ ಡ್ ಹೋಳಿ ಪರ್ಬದ ಆಚರಣೆ

ಕುಡ್ಲ: ಶ್ರೀನಿವಾಸ್ ಯೂನಿವರ್ಸಿಟಿ ಇನ್ಸ್ಟಿಟ್ಯೂಟ್ ಆಫ್ ಹೋಟೆಲ್ ಮ್ಯಾನೇಜ್ಮೆಂಟ್ & ಟೂರಿಸಂ, ಇನ್ಸ್ಟಿಟ್ಯೂಟ್ ಆಫ್ ಏವಿಯೇಶನ್ ಸ್ಟಡೀಸ್ ಬೊಕ್ಕ ಡಿಪಾರ್ಟ್ಮೆಂಟ್ ಆಫ್ ಇಂಟೀರಿಯರ್ ಡಿಸೈನ್  ಪಾಂಡೇಶ್ವರ ನೆತ್ತ ಒಟ್ಟುಸೇರಿಗೆಡ್ ಹೋಳಿ ಪರ್ಬದ ಆಚರಣೆ ಮಾ.7 (ಇನಿ) ಮಧ್ಯಾಹ್ನ 1 ಗಂಟೆಗ್ ಕುಡ್ಲದ ಪಾಂಡೇಶ್ವರ ಶ್ರೀನಿವಾಸ್ ಸಿಟಿ ಕ್ಯಾಂಪಸ್ ಡ್ ನಡಪರೆ ಉಂಡು.

ಈ ಲೇಸ್ ದ ಗುರ್ಕಾರ್ಮೆನ್ ಶ್ರೀನಿವಾಸ ವಿಶ್ವವಿದ್ಯಾಲಯದ ಗೌರವಾನ್ವಿತ ಕುಲಪತಿಲು ಬೊಕ್ಕ ಕುಡ್ಲ ಎಎಸ್ಎಫ್ ದ ಉಪಾಧ್ಯಕ್ಷೆರ್ ಡಾ.ಸಿಎ ಎ.ರಾಘವೇಂದ್ರ ರಾವ್ ಒಯಿಸೊನ್ವೆರ್. ಮಲ್ಲ ಬಿನ್ನೆರಾದ್ ಗೌರವಾನ್ವಿತ ಪ್ರೊ-ಕುಲಪತಿಲು, ಡಾ. ಎ ಶೀನಿವಾಸ್ ರಾವ್, ಆಡಳಿತ ಮಂಡಳಿ ಟ್ರಸ್ಟಿ-ಸದಸ್ಯೆರ್ ಎ. ವಿಜಯಲಶ್ಮಿ ಆರ್ ರಾವ್, ಆಡಳಿತ ಮಂಡಳಿ ಟ್ರಸ್ಟಿ-ಸದಸ್ಯೆರ್ ಬೊಕ್ಕ ಕುಡ್ಲ ಎಎಸ್ಎಫ್ ದ ಕಾರ್ಯದರ್ಶಿ ಪ್ರೊ. ಎರ್. ಎ ಮಿತ್ರ ಎಸ್ ರಾವ್, ಉಪಕುಲಪತಿಲು ಡಾ. ಪಿಎಸ್ ಐತಾಳ್ ಬರಿಯೆರೆ ಉಲ್ಲೆರ್ ಪಂದ್ ರಿಜಿಸ್ಟ್ರಾರ್ ಡಾ ಅನಿಲ್ ಕುಮಾರ್, ಅಭಿವೃದ್ಧಿ ರಿಜಿಸ್ಟ್ರಾರ್
ಡಾ ಅಜಯ್ ಕುಮಾರ್, ಇನ್‌ಸ್ಟಿಟ್ಯೂಟ್ ಆಫ್ ಹೋಟೆಲ್ ಮ್ಯಾನೇಜ್‌ಮೆಂಟ್ ಅಂಡ್ ಟೂರಿಸಂದ ಪ್ರೊ. ಸ್ವಾಮಿನಾಥನ್ ಎಸ್ ಡೀನ್, ಮೌಲ್ಯಮಾಪನ ರಿಜಿಸ್ಟ್ರಾರ್ ಡಾ. ಶ್ರೀನಿವಾಸ ಮಯ್ಯ ಡಿ., ಶೈಕ್ಷಣಿಕ ಬೊಕ್ಕ ಅಭಿವೃದ್ಧಿ ರಿಜಿಸ್ಟ್ರಾರ್ ಆದಿತ್ಯ ಕುಮಾರ್ ಮೈಯಾ, ಇನ್‌ಸ್ಟಿಟ್ಯೂಟ್ ಆಫ್ ಏವಿಯೇಶನ್ ಸ್ಟಡೀಸ್ ದ ಪವಿತ್ರಾ ಕುಮಾರಿ ಡೀನ್ ಲೆಪ್ಪೋಲೆಡ್ ತೆರಿಪಾದೆರ್.

Holi celebrations today at Srinivas city campus, Pandeshwar

Mangalore: Holi celebrations will be held on March 7 th at Srinivas city Campus Pandeshwar from 1 p. m onwards.
The program will be presented by the chancellor of Srinivas University Dr CA A Raghavendra Rao.
A host of dignitaries including those from the management of the Srinivas group of institutions are expected to participate in the program.

Divine land Gejjegiri Shri Deyi Baidyethi – Koti Chennya Moola Stana ಕಾರ್ಣಿಕದ ನಿಲೆ ಗೆಜ್ಜೆಗಿರಿ ಶ್ರೀ ದೇಯಿ ಬೈದ್ಯೆತಿ-ಕೋಟಿ ಚೆನ್ನಯ ಮೂಲಸ್ಥಾನ

ಪುತ್ತೂರ್: ಐನೂದು ವರ್ಷೊದ ಪಿರವು ತುಳುನಾಡ್ ದ ಇತಿಹಾಸಡ್ ಪೊಸ ಮೈಲ್ ಗಲ್ಲ್ ಊರ್ದಿನ ಗೆಜ್ಜೆಗಿರಿ ನಂದನ ಬಿತ್ತಿಲ್ ಕ್ಷೇತ್ರ ಇತ್ತೆ ಜೀರ್ಣೋದ್ಧಾರ ಆದ್, ದೇಯಿ ಬೈದ್ಯೆತಿ, ಕೋಟಿ ಚೆನ್ನಯರೆನ ಕಾರ್ಣಿಕದ ನಿಲೆ ಪಂದ್ ಲೋಕೊರ್ಮೆ ಪುಗರ್ತೆ ಪಡೆದ್ಂಡ್.

2020ನೇ ಇಸವಿಡ್ ಫೆ.26ರ್ದ್ ಮಾ.2 ಮುಟ್ಟ ಗೌಜಿಡ್ ಪ್ರತಿಷ್ಠಾ ಬ್ರಹ್ಮಕಲಶ ಉಚ್ಚಯ ನಡತ್ ದ್ಂಡ್. 2017 ತ ಫೆ.19 ಕ್ ಕ್ಷೇತ್ರದ ಪುನರ್ ನಿರ್ಮಾಣಗ್ ಕೆಸರ್ ಕಲ್ಲ್ ಪಾಡ್ದಿತ್ತೆರ್. ತುಳುನಾಡ್ ಮಾತ್ರ ಅತ್ತಂದೆ, ಬೆಂಗ್ಲೂರ್, ಬೊಂಬೈ, ಗುಜರಾತ್, ಡೆಲ್ಲಿ ಬೊಕ್ಕ ಪಿದಯಿ ದೇಶೊರ್ದುಲ ಲಕ್ಷ ಲಕ್ಷ ಸಂಖ್ಯೆಡ್ ಭಕ್ತೆರ್ ಆನಿದ ಐತಿಹಾಸಿಕ ಲೇಸ್ ಡ್ ಪಾಲ್ ಪಡೆಯೆರ್. ಕೋಟಿ ಚೆನ್ನಯೆರೆನ ಮೂಲ ಇಲ್ಲ್ ಆಯಿನ ಗೆಜ್ಜೆಗಿರಿ ಅಪ್ಪೆ ದೇಯಿ ಬೈದ್ಯೆತಿಗ್ ಪುನರ್ಜನ್ಮ ಕೊರ್ತಿನ ತಾನ. ಉಂದು ಗುರು ಸಾಯನ ಬೈದ್ಯೆನ ಕರ್ಮಭೂಮಿ. ಈ ಮೂಜಿ ತಲೆಮಾರ್ ದ ಕಾರಣಿಕ ಶಕ್ತಿಲೆನ ಆರಾಧನೆ ಗೆಜ್ಜೆಗಿರಿಟ್ ಐನ್ ಶತಮಾನದ ಬೊಕ್ಕ ಇತ್ತೆ ಸುರುತ ಸರ್ತಿ ಸುರು ಆತ್ಂಡ್. ಕೋಟಿ ಚೆನ್ನಯೆರೆನ್ ಆರಾಧನೆ ಮಲ್ಪುನ ಸುಮಾರ್ 247 ದಾತ್ ಗರಡಿಲು ಉಂಡು. ಅವು ಮಾತೆಕ್ಲಾ ಕಲಶಪ್ರಾಯ ಆತ್ಂಡ್ ಗೆಜ್ಜೆಗಿರಿ ಮೂಲಸ್ಥಾನ ಗರಡಿ ಕೋಟಿ ಚೆನ್ನಯೆರೆನ ಮೂಲ ಮಣ್ಣ್. ಮುಲ್ಪ ಅಪ್ಪೆ ಬೊಕ್ಕ ಜೋಕುಲೆನ ಸಮಾಗಮ ಆರಾಧನೆ ಕೌಟುಂಬಿಕ ತರವಾಡ್ ಚೌಕಟ್ಟ್ ಡ್ ನಡತೊಂದು ಉಂಡು.

ಒಲ್ಪ ಉಂಡು ಗೆಜ್ಜೆಗಿರಿ?
ದಕ್ಷಿಣ ಕನ್ನಡ ಜಿಲ್ಲೆದ ಪುತ್ತೂರ್ ತಾಲೂಕ್ ದ ಬಡಗನ್ನೂರು ಗ್ರಾಮಡ್ ಇಪ್ಪುನ ಗೆಜ್ಜೆಗಿರಿ ಕ್ಷೇತ್ರ ಐನ್ ಶತಮಾನದ ಪಿರವು ಪಡುಮಲೆ ಬಲ್ಲಾಳರೆನ ಸಂಸ್ಥಾನ ಆದಿತ್ತ್ಂಡ್. ನೆತ್ತ ವ್ಯಾಪ್ತಿಡ್ ಬರ್ಪುನ ಏರಾಜೆ ಬರ್ಕೆ ಪನ್ಪುನ ಪುಗರ್ತೆದ ಇಲ್ಲ್ ಉಂದಾತ್ಂಡ್. ಬಲ್ಲಾಳ ಅರಸೆರೆಗ್ ಸೈನ್ಯ ತಯಾರ್ ಮಲ್ತ್ ದ್ ಕೊರೊಂದು ಇತ್ತಿನ ಇಲ್ಲ್ ಉಂದು. ಉಂದುವೇ ಇಲ್ಲ್ ಗೆಜ್ಜೆಗಿರಿ ನಂದನ ಬಿತ್ತ್‌ಲ್ ಪಂದ್ ಪುದರಾಂಡ್. ಸಾಯನ ಬೈದ್ಯೆರ್ ಈ ಅಮರ್ ವೀರೆರೆನ ಮಾಮು ಆದ್, ಮಾರ್ಗದರ್ಶಕೆರಾದ್, ಗುರುಕುಲು ಆದಿತ್ತೆರ್. ಅಪ್ಪೆ ಬಂಜಿಡ್ ಪುಟ್ಟಂದೆ ಪುಟ್ಟಿನ ಸ್ವರ್ಣ ಕೇದಗೆನ್ ಆರೆನ ತಾಂಕಿನ ಅಮ್ಮೆರ್, ಕಾಡ್ ಡ್ ಬುಡ್ದ್ ಪೋಯಿನೆರ್ದ್ ಬೊಕ್ಕ ಸಾಯನ ಬೈದ್ಯೆರ್ ಮೆರೆನ್ ಮೆಗ್ದಿ ಪಂದ್ ಸ್ವೀಕಾರ ಮಲ್ತ್ ದ್ ತನ್ನ ಗೆಜ್ಜೆಗಿರಿ ಇಲ್ಲಗ್ ಲೆತೊಂದು ಬತ್ತ್ ದ್ ತಾಂಕಿನಿ ಅತ್ತಂದೆ, ದೇಯಿ ಬೈದ್ಯೆತಿ ಪನ್ಪುನ ಪುದರ್ ದೀದ್, ಪುಗರ್ತೆದ ನಾಟಿ ವೈದ್ಯ ವಿದ್ಯೆ ಕಲ್ಪಾಯೆರ್.
ಕರ್ಗಲ್ಲ ತೋಟ ಕಾಂತಣ್ಣ ಬೈದ್ಯೆರೆನ ಬೊಡೆದಿ ಆಯಿನ ದೇಯಿ ಗೆಜ್ಜೆಗಿರಿ ಇಲ್ಲಲ್ ದಿಂಜಿ ಬಂಜಿನಾಲ್ ಆದ್ ಪಡುಮಲೆ ಬಲ್ಲಾಲ್ರೆನ ಕಾರ್ ದ ನಂಜಿದ ಬೇನೆ ಕಮ್ಮಿ ಮಲ್ಪೆರೆ ಬರ್ಪೆರ್. ನೇರ್ದ್ ಅರಸುಲು ಗುಣ ಆಪೆರ್. ಬೊಕ್ಕ ಅಮರ್ ಜೋಕುಲೆಗ್ ಜನ್ಮ ಕೊರ್ನ ದೇಯಿ ತೀರ್ ಪೋಪೆರ್. ಈ ಪೊರ್ತುಡು ಅಣ್ಣೆ ಸಾಯನ ಬೈದ್ಯೆರ್ ಮೆಗ್ದಿನ ಸರ್ರೊನು ಗೆಜ್ಜೆಗಿರಿಕ್ ಕನತ್ ದ್ ಮಣ್ಣ್ ಮಲ್ಪುವೆರ್. ಆ ಸಮಾಧಿ ಇತ್ತೆಲ ಗೆಜ್ಜೆಗಿರಿಟ್ ಉಂಡು. ದೇಯಿ ಬೈದ್ಯೆತಿ ಮಹಾಸಮಾಧಿ ಪನ್ಪುನ ಪುದರ್ ನ್ ಪಡೆತ್ಂಡ್. ಅಪ್ಪೆನ್ ಕಳೆವೊನ್ನ ಕೋಟಿ ಚೆನ್ನಯೆರ್ ಮಾಮುನ ನಿರೆಲ್ ಡೇ ಗೆಜ್ಜೆಗಿರಿಟ್ ಬುಲೆದ್ ಮಾತ ವಿದ್ಯೆನ್ ಕಲ್ತ್ ದ್, ಕಾರಣಿಕ ಪುರುಷೆರಾಯೆರ್. ಮಂತ್ರಿ ಬುದ್ಧಿವಂತನ್ ಕೆರ್ನ ಬೊಕ್ಕ ಪಂಜರ್ದ್ ಎಣ್ಮೂರುಗ್ ಪೋಪುನ ಮೊಕುಲು ಮಸ್ತ್ ಕಾರಣಿಕ, ಶೌರ್ಯ, ಪರಾಕ್ರಮ ತೂಪಾವೆರ್. ಸತ್ಯ ಧರ್ಮಗಾದ್ ಪ್ರಾಣಾರ್ಪಣೆ ಮಲ್ಪುವೆರ್. ಆನಿರ್ದ್ ಮೊಕ್ಲೆನ ಗರಡಿ ಆರಾಧನೆ ಸುರು ಆಂಡ್.

ಕ್ಷೇತ್ರದ ವಿಶೇಷ
*ದುಂಬು ಕೋಟಿ ಚೆನ್ನಯೆರ್, ದೇಯಿ ಬೈದ್ಯೆತಿ ಬೊಕ್ಕ ಸಾಯನ ಗುರುಕುಲು ಬಾಳ್ ದ್ ಬದ್ ಕ್ ದಿನ ಗೆಜ್ಜೆಗಿರಿತ್ತ ಮೂಲ ಇಲ್ಲೇ ಇನಿ ಭವ್ಯವಾದ್ ಪುನರ್ ತಾನ ಆತ್ಂಡ್. ಅವೆನ್ ಸತ್ಯಧರ್ಮ ಚಾವಡಿ ಪಂದ್ ಲೆಪ್ಪುವೆರ್. ಈ ಚಾವಡಿದ ಗರ್ಭ ಗುಡಿಟ್ ದೇಯಿ ಬೈದ್ಯೆತಿದ ಮೂರ್ತಿ ಪ್ರತಿಷ್ಠಾಪನೆ ನಡತ್ಂಡ್.
ಸತ್ಯಧರ್ಮ ಚಾವಡಿದುಲಯಿ ಈಶಾನ್ಯ ಭಾಗಡ್ ಸಾಯನ ಗುರುಕುಲೆನ ಗುರುಪೀಠ ಸ್ಥಾಪನೆ ಆತ್ಂಡ್.
* ಸಾಯನ ಗುರುಕುಲೆನ ಪೆರಿಯೆರೆನ ಕಾಲರ್ದ್ ಇಂಚ ಈ ಮಣ್ಣ್ ಡ್ ಆರಾಧನೆ ಪಡೆವೊಂದು ಇತ್ತಿನ ಧರ್ಮದೈವ ಧೂಮಾವತಿ ಬೊಕ್ಕ ಕುಪ್ಪೆ ಪಂಜುರ್ಲಿ ದೈವೊಲೆನ ಸಾನಿಧ್ಯ ಪುನರ್ ನಿರ್ಮಾಣ ಆಂಡ್.
*ಅಪ್ಪೆ ದೇಯಿ ಬೈದ್ಯೆತಿನ ಸಮಾಧಿ ಬನತ್ತ ರೂಪಡ್ ಸಂರಕ್ಷಣೆ ಆವೊಂದು ಬೈದ್ಂಡ್. ಅವೆನ್ ಇತ್ತೆ ಸುಂದರ ಸ್ಮಾರಕವಾದ್ ಅಭಿವೃದ್ಧಿ ಮಲ್ದೆರ್.
*ಪಡುಮಲೆ ಬಲ್ಲಾಳ ಅರಸು ಅಪ್ಪೆ ದೇಯಿ ಬೈದ್ಯೆತಿಗಾದ್ ಕಡಪಾದ್ ಕೊರ್ದಿತ್ತಿನ ರಾಜ ದಂಡಿಗೆನ್ ದೀದಿತ್ತಿನ ಚಾರಿತ್ರಿಕ ಸರೋಳಿ ಸೈಮಂಜ ಕಟ್ಟೆನ್ ಸುಂದರವಾದ್ ಮರು ನಿರ್ಮಾಣ ಆತ್ಂಡ್.
*ಗೆಜ್ಜೆಗಿರಿತ್ತ ಕೊಡಿಟ್ಟ್ ಕೋಟಿ ಚೆನ್ನಯೆರೆನ ಮೂಲಸ್ಥಾನ ಗರಡಿ ನಿರ್ಮಾಣ ಆತ್ಂಡ್. ಗರಡಿಗ್ ಎದುರುಡು ಬೆರ್ಮೆರ್ ಗುಂಡ ಉಂಡು.

ಅಪ್ಪೆ ದೇಯಿ ಬೈದೆತಿ-ಕೋಟಿ ಚೆನ್ನಯ ಮೂಲಸ್ಥಾನ ಕ್ಷೇತ್ರವಾಯಿನ ಗೆಜ್ಜೆಗಿರಿ ನಂದನ ಬಿತ್ತ್ ಲ್ ಡ್ ಈ ವರ್ಷದ ಜಾತ್ರೆ ಮಾ.16-20 ಮುಟ್ಟ ನಡಪರೆ ಉಂಡು.

ಬೆದ್ರ ಶಿವಾನಂದ ತಂತ್ರಿಲೆನ ಮುತಾಲಿಕೆಡ್ ವೈದಿಕ ವಿಧಿ ವಿಧಾನಲು ನಡಪರೆ ಉಂಡು. ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್ ಸಿರಿಮುಡಿ ಗಂಧ ಪ್ರಸಾದ ದೆತೊಂದು ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಅನುವಂಶಿಕ ಮೊಕ್ತೇಸರೆರ್, ನೇಮ ಉಚ್ಚಯ ಸಮಿತಿದ ಸಂಚಾಲಕೆರ್, ಸದಸ್ಯೆರ್, ಶ್ರೀ ಕ್ಷೇತ್ರ ಗೆಜ್ಜೆಗಿರಿತ್ತ ಅಧ್ಯಕ್ಷೆರ್, ಪದಾಧಿಕಾರಿಲು ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.