ನ್ಯೂಯಾರ್ಕ್: ಅಮೆರಿಕಾದ ಜಾರ್ಜಿಯಾಡ್ ಭಾರತದ ಜನತ ಮಿತ್ತ್ ಮೂಜಿ ಜನ ಮುಸುಕು ಪಾಡ್ದಿನಕ್ಲೆನ ಕೂಟದಕುಲು ಗುಂಡು ಪಾಡ್ದಿನ ಘಟನೆ ನಡತ್ಂಡ್.
ಪಿನಲ್‌ ಪಟೇಲ್‌ (52) ಈ ಘಟನೆಡ್ ತೀರ್ ಪೋಯಿನಾರ್. ಮೆರೆನ ಬೊಡೆದಿ ರೂಪಾಲ್‌ಬೆನ್‌ ಪಟೇಲ್‌ ಬೊಕ್ಕ ಮಗಲ್ ಭಕ್ತಿ ಪಟೇಲ್‌ ಮಿತ್ತ್ ಲ ಬಚ್ಚಾಲಿಲು ಗುಂಡು ಪಾಡ್ದೆರ್. ಪೆಟ್ಟಾಯಿನ ಮೊಕ್ಲೆನ್ ಕೂಡ್ಲೆ ಆಸ್ಪತ್ರೆಗ್ ದಾಖಲ್ ಮಲ್ದೆರ್ ಪಂದ್ ತೆರಿದ್ ಬೈದ್ಂಡ್. ಈ ಬಗೆಟ್ ಜಾರ್ಜಿಯಾ ಪೊಲೀಸೆರ್ ಕೇಸ್ ದಾಖಲ್ ಮಲ್ತ್ ದ್, ತನಿಖೆ ನಡಪಾವೊಂದು ಉಲ್ಲೆರ್.
ಸಿಂಧನೂರು: 74 ನೇ ಗಣರಾಜ್ಯ ಉಚ್ಚಯದ ಪೊರ್ತುಡು ಕೋಲಾಟ ಮಲ್ತೊಂದಿತ್ತಿನ ನೌಕರೆ ಒರಿ ತಿಗಲೆ ಬೇನೆಡ್ ತಿರ್ತ್ ಬೂರ್ದು ತೀರ್ ಪೋಯಿನ ಘಟನೆ ತಾಲೂಕ್‌ದ ಕ್ರೀಡಾಂಗಣಡ್ ನಡತ್ಂಡ್.
ಸರಕಾರಿ ಆಸ್ಪತ್ರೆದ ಬೇಲೆದಾರ್ ಮಹಾಂತೇಶ ಪೂಜಾರ್ (40) ತೀರ್ ಪೋಯಿನಾರ್. ಕೋಲಾಟ ಮಲ್ತೊಂದಿಪ್ಪುನಗ ತಿರ್ತ್ ಬೂರ್ದೆರ್. ಅಪಗನೆ ಅರೆನ್ ನಗರಸಭೆ ಅಧ್ಯಕ್ಷೆರ್ ಮಲ್ಲಿಕಾರ್ಜುನ ಪಾಟೀಲ್ ಆಸ್ಪತ್ರೆಗ್ ಲೆತೊಂದು ಪೋದಿತ್ತೆರ್. ತಿಗಲೆ ಬೇನೆ ಆದ್ ತೀರ್ ಪೋಯೆರ್ ಪಂದ್ ಡಾಕ್ಟರ್ ತೆರಿಪಾದೆರ್.
ಮರೋಡಿ ಗ್ರಾಮದ ಅಟ್ಲಬೆಟ್ಟುಡು ಪೊಸತಾದ್ ನಿರ್ಮಾಣ ಆಯಿನ ಇಲ್ಲ್ ಅನ್ನಪೂರ್ಣ ನೆತ್ತ ಇಲ್ಲ್ ಒಕ್ಕೆಲ್ ಇನಿ (ಜ.26) ನಡಪರೆ ಉಂಡು.
ಮಧ್ಯಾಹ್ನ 12 ಗಂಟೆಗ್ ಸತ್ಯನಾರಾಯಣ ಪೂಜೆ, ಬಯ್ಯಗ್ ಇಲ್ಲದ ಎದುರು ಜಾಲ್ ಡ್ ಪಾಡ್ದಿನ ರಂಗಮಂಟಪಡ್ ಕಟೀಲ್ ಶ್ರೀ ದುರ್ಗಾಪರಮೇಶ್ವರೀ ಮೇಳದಕ್ಲೆನ ಶ್ರೀ ದೇವಿ ಮಹಾತ್ಮೆ ಆಟ ನಡಪರೆ ಉಂಡು. ಬೊಕ್ಕ ಜ.27 ಶುಕ್ರಾರ ಬಯ್ಯಗ್ ಧೂಮ್ರ-ಧೂಮಾವತಿ ಬೊಕ್ಕ ಪರಿವಾರ ದೈವೊಲೆನ ಗಗ್ಗರ ಸೇವೆ ನಡಪರೆ ಉಂಡು. ಈ ಮಾತ ಲೇಸ್ ಗ್ ಮಾತೆರ್ಲಾ ಬತ್ತ್ ದ್, ಎಕ್ಲೆಗ್ ಎಡ್ಡೆಪ್ಪು ಬಯಕೊಡು ಪಂದ್ ಮರೋಡಿ ರೂಪಲತಾ ಬೊಕ್ಕ ರವೀಂದ್ರ ಅಂಚನ್, ಪ್ರಮೀಳಾ ಬೊಕ್ಕ ಸುರೇಶ್ ಅಂಚನ್ ಲೆಪ್ಪೋಲೆಡ್ ತೆರಿಪಾದೆರ್.
ನ್ಯೂಯಾರ್ಕ್: ಅಮೆರಿಕ ಕ್ಯಾಪಿಟಲ್ ಹಿಲ್‌ ದ ಮಿತ್ತ್ ಜನವರಿ 6, 2021 ಟ್ ನಡತಿನ ದಾಳಿದ ಬೊಕ್ಕ ರಡ್ಡ್ ವರ್ಷ ಮುಟ್ಟ ಬ್ಲಾಕ್ ಆಯಿನ ಮಾಜಿ ಅಮೆರಿಕದ ಅಧ್ಯಕ್ಷೆರ್ ಡೊನಾಲ್ಡ್ ಟ್ರಂಪ್ ಮೆರೆನ ಫೇಸ್‌ಬುಕ್, ಇನ್‌ಸ್ಟಾಗ್ರಾಮ್ ಅಕೌಂಟ್ ನ್ ರೀ ಓಪನ್ ಮಲ್ಪುವ ಪಂದ್ ಮೆಟಾ ಪ್ಲಾಟ್‌ಫಾರ್ಮ್ಸ್ ಬುಧಾರ ಘೋಷಣೆ ಮಲ್ದ್ಂಡ್.
ಈ ಬಗೆಟ್ ಮೆಟಾದ ಜಾಗತಿಕ ವ್ಯವಹಾರಲೆನ ಅಧ್ಯಕ್ಷೆರ್ ಮೆಟಾನಿಕ್ ಕ್ಲೆಗ್ ಮೇರ್, ಮಾತೆರ್ಲೆಕ್ಕ ಟ್ರಂಪ್ ಲ ನಿಯಮ ಉಲ್ಲಂಘನೆ ಮಲ್ತ್ಂಡ ದಂಡ ಕಟ್ಟೊಡು ಪಂದ್ ಪಂಡೆರ್.
ಪುತ್ತೂರ್: ಎಸ್.ಪಿ.ವೈ.ಎಸ್.ಎಸ್. ಯೋಗ ಸಮಿತಿದ ವತಿರ್ದ್ ಪುತ್ತೂರ್ ಮಹತೋಭಾರ ಶ್ರೀ ಮಹಾಲಿಂಗೇಶ್ವರ ದೇವಲ್ಯದ ರಥಬೀದಿಡ್ ರಥಸಪ್ತಮಿ ಅಂಗವಾದ್ ಜ. 29 ಬೊಲ್ಪುಗು 5 ಗಂಟೆರ್ದ್ 7 ಗಂಟೆ ಮುಟ್ಟ 108 ಸೂರ್ಯ ನಮಸ್ಕಾರ ನಡಪರೆ ಉಂಡು.
ಬೊಲ್ಪುಗು 7 ಗಂಟೆರ್ದ್ ಬಯ್ಯ 6 ಗಂಟೆದ ಬೊಕ್ಕ ದೇವಲ್ಯದ ಮುಖಮಂಟಪಡ್ ಅಖಂಡ ಸೂರ್ಯ ನಮಸ್ಕಾರ ನಡಪರೆ ಉಂಡು. ಕರ್ನಾಟಕ ಶ್ರೀ ಪತಂಜಲಿ ಯೋಗ ಶಿಕ್ಷಣ ಸಮಿತಿದ ಕುಡ್ಲ ನೇತ್ರಾವತಿ ವಲಯದ ಮುತಾಲಿಕೆಡ್ ನಡಪುನ ಈ ಲೇಸ್ ನ್ ಪುತ್ತೂರ್ ಶ್ರೀ ಮಹಾಲಿಂಗೇಶ್ವರ ದೇವಲ್ಯದ ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರ್ ಕೇಶವ ಪ್ರಸಾದ್ ಮುಳಿಯ ಉದಿಪನ ಮಲ್ಪುವೆರ್. ಬೊಕ್ಕ ಎಸ್.ಪಿ.ವೈ.ಎಸ್.ಎಸ್. ಯೋಗ ಸಮಿತಿದ ಪ್ರಮುಖೆರ್ ಪಾಲ್ ಪಡೆಪೆರ್ ಪಂದ್ ಲೇಸ್ ದ ಸಂಚಾಲಕೆರ್ ರಾಮಚಂದ್ರ ಪ್ರಕಟಣೆ ತೆರಿಪಾದೆರ್.
ಕೊಟ್ಟಿಗೆಹಾರ: ಕಾಲೇಜ್ ಬಸ್ ಬೊಕ್ಕ ಗ್ಯಾಸ್ ಲಾರಿ ಗುದ್ದುದು ಬಸ್ ಡ್ರೈವರ್ ಸೇರ್ದ್ ಕಾಲೇಜ್ ಕಲ್ಪಾರ್ಥಿಲೆಗ್ ಪೆಟ್ಟಾಯಿನ ಘಟನೆ ಬಣಕಲ್ ಠಾಣಾ ವ್ಯಾಪ್ತಿಡ್ ರಾಷ್ಟ್ರೀಯ ಹೆದ್ದಾರಿ 73 ಮೂಡಿಗೆರೆ ತಾಲೂಕ್ ದ ಚಕ್ ಮಕ್ಕಿ ಕೈತಲ್ ನಡತ್ಂಡ್.
ಪೆಟ್ಟಾಯಿನಕ್ಲೆನ್ ಆಸ್ಪತ್ರೆಗ್ ದಾಖಲ್ ಮಲ್ತ್ ದ್, ಚಿಕಿತ್ಸೆ ಕೊರೊಂದು ಉಲ್ಲೆರ್.
ಕುಡ್ಲ: ಒಡಿಪುದ ಪುಗರ್ತೆದ ವೈದ್ಯೆರ್ ಡಾ. ಶ್ರೀಧರ ಹೊಳ್ಳ ಮೇರ್ ಹುಷಾರ್‌ದಾಂತೆ ತೀರ್ ಪೊಯೆರ್.
ಇಲ್ಲಡ್ ಬೂರ್ದು ತರೆಕ್ಕ್ ಮಸ್ತ್ ಪೆಟ್ಟಾತಿನೆಡ್ದಾವರ ಅರೆನ್ 40 ದಿನತ್ತ ಪಿರವು ಮಣಿಪಾಲದ ಆಸ್ಪತ್ರೆಡ್ ದಾಖಲ್ ಮಲ್ತ್‌ದಿತ್ತೆರ್. ಇನಿ ಚಿಕಿತ್ಸೆ ಫಲಕಾರಿ ಆವಂದೆ ತೀರ್ ಪೋಯೆರ್. ಒಡಿಪುದ ಕಲ್ಪನಾ ಪಿಚ್ಚರ್‌ದ ಕೈತಲ್ ಇಪ್ಪುನ ಮಿತ್ರ ಆಸ್ಪತ್ರೆದ ವ್ಯವಸ್ಥಾಪಕ ನಿರ್ದೇಶಕೆರ್ ಆದ್ ಸೇವೆ ಮಲ್ತೊಂದಿತ್ತೆರ್.
ಕಾರ್ಲ: ಆಚಾರ-ಇಚಾರ ಪದ್ದತಿಲು ಒಂಜಿ ಜಾಗೆರ್ದ್ ನನೊಂಜಿ ಜಾಗೆಗ್ ಬದಲ್ ಆದಿಪ್ಪುಂಡು. ಇತ್ತೆ ಒಂಜೇ ವೇದಿಕೆಡ್ ಬೇತೆ ಬೇತೆ ಜಾಗೆದ ವಸ್ತು, ಉತ್ಪನ್ನಲೆನ್ ತೂಪಿನ ಅವಕಾಶ ತಿಕ್ ದ್ಂಡ್ ಪಂದ್ ಇಂಧನ ಸಚಿವೆರ್ ವಿ. ಸುನಿಲ್ ಕುಮಾರ್ ಪಂಡೆರ್.
ಆರ್ ಜಿಲ್ಲಾಡಳಿತ, ಜಿಲ್ಲಾ ಪಂಚಾಯತ್ ಒಡಿಪು, ಭಾರತ ಸರ್ಕಾರ-ಗಾಂಧೀ ಸಿಲ್ಕ್ ಬಜಾರ್, ಕರ್ನಾಟಕ ರಾಜ್ಯ ಕರಕುಶಲ ಅಭಿವೃದ್ದಿ ನಿಗಮ ಬೆಂಗ್ಲೂರು, ರಾಜ್ಯ ಗ್ರಾಮೀಣ ಜೀವನೋಪಾಯ ಅಭಿಯಾನದ ಸಂಜೀವಿನಿ ರಾಷ್ಟ್ರಮಟ್ಟದ ಕರಕುಶಲ ವಸ್ತುಪ್ರದರ್ಶನ ಬೊಕ್ಕ ರಾಜ್ಯ ಮಟ್ಟದ ಸಂಜೀವಿನ ಉತ್ಪನ್ನದ ಪ್ರದರ್ಶನ ಬೊಕ್ಕ ಮಾರಟ ಮಳಿಗೆನ್ ಉದಿಪನ ಮಲ್ತ್‌ದ್ ಪಾತೆರಿಯೆರ್. ಮೀನುಗಾರಿಕೆ ಬೊಕ್ಕ ಒಳನಾಡು ಸಾರಿಗೆ ಸಚಿವೆರ್, ಒಡಿಪು ಜಿಲ್ಲಾ ಉಸ್ತುವಾರಿ ಸಚಿವೆರ್ ಎಸ್. ಅಂಗಾರ ಲೇಸ್‌ನ್ ಉದಿಪನ ಮಲ್ತ್‌ದ್ ಎಡ್ಡೆಪ್ಪುನು ಬಯಕಿಯೆರ್.
ಕಾರ್ಲ: ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಮೇರ್ ಜ.27 ಕ್ಕ್ ಮಧ್ಯಾಹ್ನ 2.30 ಗಂಟೆಗ್ ಕಾರ್ಲ ತಾಲೂಕ್‌ದ ಬೈಲೂರು ಯರ್ಲಪಾಡಿಡ್ ಪರಶುರಾಮ ಥೀಮ್ ಪಾರ್ಕ್ ಉದಿಪನ ಮಲ್ಪರೆ ಉಲ್ಲೆರ್.
ಉಂದುವೇ ಪೊರ್ತುಡು ಆರ್ ಪರಶುರಾಮ ಮೂರ್ತಿನ್ ಲೋಕಾರ್ಪಣೆ ಮಲ್ಪರೆ ಉಲ್ಲೆರ್. ಈ ಲೇಸ್‌ಡ್ ಮಸ್ತ್ ಜನ ಮಲ್ಲ ಬಿನ್ನೆರ್ ಪಾಲ್ ಪಡೆಯರೆ ಉಲ್ಲೆರ್.
ಏಷ್ಯಾದ ರಡ್ಡನೇ ಸಿರಿವಂತೆ ಪನ್ಪಿನ ಪುಗರ್ತೆದ ಮುಕೇಶ್ ಅಂಬಾನಿ, ಕುಡ ರಡ್ಡ್ ಕಂಪೆನಿನ್ ದೆತೊನ್ಯರೆ ದುಂಬು ಬೈದೆರ್.
ಬ್ಲೂಮ್‌ಬರ್ಗ್ ವರದಿದ ಪ್ರಕಾರ, ಬ್ರೆಜಿಲ್‌ದ ಜಾರ್ಜ್ ಪೌಲೊ ಬೊಕ್ಕ ಫ್ರಾನ್ಸ್‌ದ ಕ್ಸೇವಿಯರ್ ನೀಲ್ ಥ್ರೈವ್ ಕ್ಯಾಪಿಟಲ್‌ಡ್ 3.3 % ಪಾಲ್‌ನ್ ದೆತೊನಿಯರೆ ಅಂಬಾನಿ ದುಂಬು ಬೈದೆರ್. ಈ ಕಂಪೆನಿಡ್ 3.3 % ಪಾಲ್ ಪಡೆಯರೆ ಸುಮಾರ್ 17.5 ಮಿಲಿಯನ್ ಕಾಸ್ ಆಪುಂಡು.
